Ҡәҙерле дуҫтар! «Йәшлек» гәзитенә яҙылыу хаҡы кәмене, һәм ул йәйҙән яңыса, «ҡалынайып», аҙнаһына ике тапҡыр – шишәмбелә 8 битлек, ә шәмбелә 16 битлек булып сығасаҡ.

«Йәшлек»кә хәҙер ике индекс буйынса яҙылырға була: ул өйөгөҙгә аҙнаһына ике тапҡыр ­– шишәмбе һәм шәмбе көндәрендә килһен тиһәгеҙ – 80148 индексы (ярты йылға яҙылыу хаҡы – 337 һум 86 тин), шәмбе һанын ғына алдырып уҡырға теләһәгеҙ (ярты йылға яҙылыу хаҡы – 278 һум 10 тин), 16414 индексы буйынса яҙыла алаһығыҙ.

Бергә булдыҡ, бергә ҡалайыҡ!

Башҡортостандың ауыл хужалығы предприятиеларында 222 мең гектарҙа иген һәм бөртөклө-ҡуҙаҡлы культуралар урып йыйылды. Республика буйынса 218 мең гектарҙа иген һуғылған, гектарынан уртаса уңыш 9,8 центнер тәшкил итә.
Игенселәр ужым культураларын сабып, һуғып алыуҙы тамамлай. Ҡайһы бер хужалыҡтарҙа техника арпа һуғыуға йүнәлтелә. Ҡоролоҡ арҡаһында бөртөклө культуралар әллә ни үҫмәү сәбәпле, күпселек хужалыҡтарҙа иген туранан-тура урып йыйыла. Был рәүешле юғалтыуҙарға юл ҡуйылмай.

Республикабыҙҙың Ф. Ғәс­кә­ров исемендәге дәүләт академия халыҡ бейеүҙәре ансамбле «Культура» телеканалында халыҡ бейеүҙәре аҙнаһын асып ебәрҙе.
26 июлдән 30 июлгә тиклем эфирҙа Рәсәйҙең һәм яҡын сит илдәрҙең иң яҡшы хореографик ансамблдәре сығыш яһаясаҡ. Ғәскәровсыларға тәүгеләрҙән булып сығыш яһау хоҡуғы бирелеүе осраҡлы түгел. Ансамбль 1939 йылда төҙөлә. Уны Ҙур театр тәрбиәләнеүсеһе Фәйзи Әҙһәм улы Ғәскәров ойоштора һәм утыҙ йыл дауамында алмаштырғыһыҙ етәксеһе була.

Республикабыҙҙа йәмәғәт малдарын ғына түгел, шәхси хужалыҡтарҙы ла һаҡлау буйынса өҫтәмә саралар әҙерләнә.
Бесән аҙ булғас, ауыл халҡы ҡураһындағы малын ҡайғырта. Әлбиттә, һалам да, бесән дә дефицит кимәленә еткән йылда мал ҡышлатыу еңелдән булмаясаҡ. Республика шәхси хужалыҡтарының күбеһен бөлгөнлөккә төшөргән ҡоролоҡ – агросәнәғәт өлкәһе алдында торған иң ауыр мәсьәләләрҙең береһе.
Республикала шәхси хужалыҡтарҙан ит, һөт йыйыу быға тиклем дә яйға һалынып, әүҙем ойошторола ине. Ләкин быйыл ошоғаса һәүетемсә генә эшләп килгән йүнәлеш ҡоролоҡ шарттарына тулыһынса яраҡлаша алманы, тип әйтергә кәрәк – алыпһатарҙар итте арзан хаҡҡа алырға тырыша, ә халыҡ көсөн түгеп, бөтә күңелен һалып үҫтергән малын лайыҡлы хаҡҡа һатырға теләй. Был мәсьәлә һуңғы айҙа айырыуса киҫкенләшеп китте – гәзит уҡыусылар редакцияға йыш ҡына кәңәш һорап шылтырата башланы.
Алдан уҡ шуны еткерге килә: төшөнкөлөккә бирелеп, малдарығыҙҙы арзанға һатыу яғын ҡарамағыҙ.

Башҡортостанда яңы профсоюз барлыҡҡа килде. Уны финанс һәм кредит ойошмалары хеҙмәткәрҙәре булдырҙы. Яңы профсоюз банк, һаҡлыҡ кассалары, пенсия һәм инвестиция фондтары, страховка һәм риэлтор компаниялары, башҡа финанс һәм кредит ойошмалары хеҙмәткәрҙәренең социаль-хеҙмәт, профессиональ, гражданлыҡ хоҡуҡтарын яҡлаясаҡ.
«Роспотребнадзор»ҙың БР буйынса идаралығы белгестәре ете партия аҙыҡ-түлекте ҡулланыуға яраҡһыҙ тип тапты. Башлыса, улар һөт, ит аҙыҡтары. Белгестәр шулай уҡ Өфө районының Дубрава ауылындағы алко­гол­һеҙ эсемлектәр ҡойоу цехында етештерелгән «Байкал» газлы эсемлегенең ГОСТ та­лап­тарына яуап бирмәүен асыҡлаған.

Урындағы урта мәктәптең технология уҡытыу­сыһы, бер үк ваҡытта мәктәп директорының хужалыҡ эштәре буйынса урынбаҫары Вадим Носратуллин, нимәгә тотонһа ла, бына тигән итеп башҡарыуы менән билдәле – ағас эштәренә ҡулы оҫта икән уның.
Мәктәп оҫтаханаһында уҡыусыларына иң ябай ағас йышыу, бысыу, һырлау, һырлап яндырыу кеүек эш алымдарын өйрәтеп, мәктәп кәрәк-ярағы өсөн ваҡ-төйәк етештерһәләр, эштән һуң буш ваҡытын үҙе яратҡан кәсебенә арнай. Ауылдаштары, туғандарының һорауы буйынса ултырғыстар, кәрниздәр эшләй. Ә һуңғы йылдарҙа халҡыбыҙҙың матур йолалары тормош-көнкүрешебеҙҙә тергеҙелеп, кейәүгә сыҡҡан ҡыҙҙарҙың бирнәләрен һалыр өсөн матур итеп эшләнгән һандыҡтарға һорау артты. Оҫта быны эләктереп тә ала һәм йәтеш кенә һандыҡтар етештерә башлай.

Өфөнөң Октябрь районы Нуғай ауылындағы 147-се урта мәктәптә тренажер-гимнастика комплексы булған универсаль майҙансыҡ файҙаланыуға тапшырылды. Был – 2007 – 2011 йылдарға иҫәпләнгән балалар-үҫмерҙәр спортын үҫтереү ҡала маҡсатлы программаһы буйынса Өфө ҡалаһында төҙөлгән дүртенсе майҙансыҡ.
Бындай спорт майҙансығында төрлө һауа шарттарында ла шөғөлләнергә мөмкин: йомшаҡ синтетик япма температура үҙгәреүенән, дымдан ҡурҡмай, иң мөһиме, йәш спортсыларҙы йәрәхәт алыуҙан һаҡлаясаҡ. Майҙансыҡ янында урынлашҡан тренажер-гимнастика комплексында үтәсәк дәрестәр ҙә балаларға ҙур ҡыуаныс килтерәсәк.