12-15 июндә Талҡаҫ күле буйында башҡорт форумы ҡулланыусылары һабантуйы үтәсәк
Күңелдәрҙе елкендергән, йөрәктәрҙе тулҡынландырған иң матур осор - һабантуйҙар мәле етте. Ошо ваҡытта тәбиғәт ҡосағына - сәхрәләргә - сығып, күңелле ял итеү - үҙе бер ғүмер! Башҡорт форумы ҡулланыусылары ла халҡыбыҙҙың борон-борондан килгән матур байрам йолаһын дауам итеп, йәмле Талҡаҫ буйҙарында һабантуй үткәрергә ниәт ҡылды. Был сараның информацион бағымсыһы - үҙебеҙҙең «Йәшлек» гәзите.
Форумсыларҙың һабантуйы бик үҙенсәлекле булмаҡсы. Сөнки башҡорт Интернет-порталының иң
әүҙем егеттәре һәм ҡыҙҙары милли ярыш төрҙәрендә, башҡа төрлө уйындарҙа ҡатнашыуҙан тыш,
тарихи темаларға, илебеҙҙең бөгөнгөһө һәм киләсәгенә ҡағылышлы әңгәмә-диспуттар, «түңәрәк
өҫтәл»дәр ойоштороуҙы ла планлаштыра. Һабантуй көндәрендә тарихыбыҙға «Батырша ихтилалы»
исеме аҫтында ингән ҡанлы-шанлы ваҡиғалар үткән, Зәки Вәлиди, Муса Муртазин, Шәйехзада
Бабичтар йөрөгән ер-һыу менән танышыу форсаты ла буласаҡ. Башҡортостандың беренсе баш
ҡалаһы булған Темәс ауылындағы музейға, илебеҙҙең мәртәбәле уҡытыусыларын тәрбиәләгән
урындағы педучилищеға экскурсиялар ҙа бер кемде лә битараф ҡалдырмаҫ. Шулай уҡ форумсылар
исеменән башҡорт ере, иле, теле, дине өсөн төрлө быуаттарҙа, йылдарҙа яуҙарҙа, һөргөндәрҙә
һәләк булған ата–бабалар, билдәле һәм билдәһеҙ батырҙар өсөн ҡорбан салынып, аяттар уҡытыласаҡ.
Баныу Ҡаһарманова.
