Францияның Рәсәй Федерацияһындағы илселеге делегацияһы эшлекле сәфәр менән баш ҡалабыҙ Өфөгә килде.
Делегация составына Франция илселегенең Рәсәйҙәге хеҙмәттәшлек һәм мәҙәниәт буйынса департаментының белем биреү өлкәһендә хеҙмәттәшлеге буйынса атташеһы Мирей Шеваль һәм Екатеринбургтағы «Француз альянсы» директоры Эдвард де Люмле ингән.
Сәфәрҙең маҡсаты – Башҡортостан менән Франция араһында мәҙәниәт өлкәһендәге хеҙмәттәшлек проекттарын тикшереү, шулай уҡ «Француз альянсы» йәмәғәт ойошмаһының почетлы директоры Нина Антонованы бүләкләү. Уға Франция Республикаһы Хөкүмәте «Академик пальмалар ордены кавалеры» тигән юғары исем биргән. Орденды тапшырыу тантанаһы Әхмәтзәки Вәлиди исемендәге Милли китапханала үтте.
Сәфәргә ярашлы, Мирей Шеваль һәм Эдвард де Люмле Башҡортостан Республикаһының Тышҡы иҡтисади бәйләнештәр, сауҙа һәм эшҡыуарлыҡ, Мәҙәниәт һәм милли сәйәсәт министрлыҡтары етәкселәре менән осрашты. Бынан тыш, Франция вәкилдәре М. Аҡмулла исемендәге Башҡорт дәүләт педагогия университетында булды, Милли китапханала француз уҡыу залының эше менән танышты.
Т. АМАНОВ.