Нурлы күҙҙәре менән тылсымлы ҡараш бөрккән ҡыҙ – минең әхирәтем, Фатима Морат ҡыҙы Иҫәндәүләтова. Ул таулы, урманлы, аллы-гөллө сәскәле, сылтырап аҡҡан йылғаһы булған Йылайыр районының Һынташ ауылында Йылҡы йылының Буға йондоҙлоғо аҫтында икенсе бала булып донъяға килгән.
«Башҡорт ҡатын-ҡыҙы оялсан да, уйсан да, ҡарап туймаҫлыҡ һөйкөмлө лә, рухи яҡтан да бай, кәрәк икән, ҡыйыу, батыр булырға тейеш. Ошо сифаттарҙы мин дә үҙемдә булдырырға тырышам. Сөнки ундайҙар киләсәктә юғалып ҡалмаясаҡ, тигән уйҙамын», – ти. Бөгөн Бөрө дәүләт социаль-педагогика академияһының «социаль педагогика һәм психология» факультеты студенткаһы ул.
«Үтәһе юлдарым оҙон, тормош, белем баҫҡыстары бейек. Әлбиттә, һәр кеше нимәгәлер ынтыла, ышанып, өмөтләнеп йәшәй. Минеңсә, кешене өмөт йәшәтә, – тип дауам итте һүҙен әхирәтем. – Ә хыялдарым... Хыялдарым сикһеҙ. Ләкин шуныһы асыҡ: ерҙә – ялҡын, күктә төтөн саҡтарҙа илеңә ярҙамға килергә әҙер булыу – һәр кемдең бурысы. Кешеләрҙең, бигерәк тә сабыйҙарҙың күҙҙәренә ғүмер буйы тура ҡарау өсөн ҡылған эштәрең хаҡ, барған юлың тура булырға тейеш. Был донъяла минең өсөн иң мөһиме – тыныслыҡ, дуҫлыҡ. Ошолар булғанда ғына уйҙарыбыҙ тормошҡа ашыр, бәхетле йәшәрбеҙ».
Ошондай уй-фекерҙәргә таянып, киләсәккә ҙур хыялдар менән йәшәгән әхирәтем менән сикһеҙ ғорурланам.
Фатимаға киләсәктә хыялдарының тормошҡа ашыуын теләйем.

Гөлназ ӘСМӘНДИӘРОВА.