20 октябрҙә Башҡортостандың халыҡ шағиры Мостай Кәримдең тыуыуына 89 йыл тула. Ошо уңайҙан «Башҡортостан» дәүләт киностудияhы уның «Оҙон-оҙаҡ бала саҡ» әҫәре буйынса режиссер Булат Йосопов төшөргән фильмды тамашасылар ҡарамағына тәҡдим итә. Әгәр гәзит уҡыусылар хәтерләhә, был кино өҫтөндә эш бынан бер нисә йыл элек башланғайны. Әммә финанслау етмәү сәбәпле, «Родина» кинотеатрында исем туйы үтhә лә, фильм бер ҡайҙа ла күрhәтелмәне. Белгестәр киноға ҡағылышлы фекерҙәрен әйтте, етешhеҙ яҡтарын телгә алыусылар ҙа табылды.
Әммә кино сәнғәте – ул ижад. Бәлки, янып-ярhып эшләгән эшкә бер ни тиклем «hыуынырға» ваҡыт бирергә кәрәктер?.. Режиссер Булат Йосопов, коллегаларының кә-ңәшенә ҡолаҡ hалып, ваҡыт үткәндән hуң үҙенең тәнҡит күҙлегенән сығып, «Оҙон-оҙаҡ бала саҡ» фильмын яңынан эшләп бөтөрҙө. Эш барышында уға «Башҡортостан» киностудияhында эшләүсе коллегалары ярҙам итте. Мәҙәниәт hәм милли сәйәсәт министрлығы фильмдың яңы монтажына ыңғай ҡарашын белдерҙе. Әйткәндәй, әҙәбиәт аҡhа-ҡалының балалары ла киноверсияның икенсе вариантын хуплаған.
Ошо көндәрҙә «Башҡортостан» дәүләт телерадиокомпанияhы эфирында «Оҙон-оҙаҡ бала саҡ» фильмы халыҡ хөкөмөнә сыға. Торараҡ ул DVD-дискыларҙа тараласаҡ. Режиссер Булат Йосопов әйтеүенсә, фильм тулыhынса повесть сюжетына ҡоролған тип әйтеп булмай. Әммә унда Мостай әҫәрҙәренә хас булғанса яҡтылыҡ, йылылыҡ рухы hалынған. «БСТ» каналында фильмды ҡарарға онотмағыҙ. Ул халыҡ шағирының тыуған көнөнә тиклем эфирға сығырға тейеш, тип вәғәҙәләй фильм авторҙары.
Л. АБДУЛЛИНА.