Республика башлығы Мортаза Рәхимов шәмбелә эш сәфәре барышында Өфөнөң Калинин районы Максимовка ҡасабаһындағы «Максимовка сусҡасылыҡ комплексы» ауыл хужалығы предприятиеһының эше менән танышты.

Комплекс «Агросәнәғәт комплексын үҫтереү» өҫтөнлөклө милли проектында ҡатнаша. Ул производство биналарын модернизациялағандан һуң ноябрҙә файҙаланыуға тапшырылған.
Предприятиела Башҡортостан Президенты йәш малды аҫрау шарттары менән танышты, етештерелгән продукцияны һатыу перспективаһы менән ҡыҙыҡһынды. Хужалыҡ етәкселәренең һүҙҙәренсә, комплекс йылына яҡынса 3,5 мең тонна сусҡа ите етештереүгә иҫәп тота. Белгестәрҙең фекеренсә, бында Европа предприятиелары кимәлендәге производство күрһәткестәренә өлгәшерлек бөтә шарт бар. Комплекста персоналды уҡытыу үҙәге лә булдырырға ниәтләйҙәр.
Мортаза Рәхимов «Максимовка сусҡасылыҡ комплексы» яуаплылығы сикләнгән йәмғиәттең эшен ыңғай баһаланы һәм республиканың ауыл хужалығы продукцияһы етештереүселәренә ярҙам итеүҙең мөһимлеген билдәләне.