Поэзияһы ла, драматургияһы ла, прозаһы ла үҙенең бай һәм образлы теле менән уҡыусының иғтибарын тартып торған бөйөк әҙип Баязит Бикбайҙың тыуыуына 100 йыл тулыу айҡанлы Илеш районының бик күп мәктәптәрендә, китапханаларҙа хәтер кисәләре, күргәҙмәләр үтте.
Яҙыусының танылған драма һәм музыкаль комедия әҫәрҙәренән өҙөктәр сәхнәләштерелде, шиғырҙары яттан һөйләнде һәм проза әҫәрҙәре буйынса фекер алышыуҙар үтте. Район китапханаһында уҙған «Баязит Бикбай – талант эйәһе» тип аталған кисәлә бөйөк яҙыусының талантына ғашиҡ ҡәләмдәше һәм дуҫы, үҙе лә күренекле шағир булып танылған Муса Сиражи Баязит Бикбайҙың тормош һәм ижад юлы менән яҡындан таныштырҙы. Ул Баязит Бикбай менән икеһенә ҡағылышлы ҡыҙыҡлы хәлдәрҙе һөйләне, үҙен нәшриәт директоры менән таныштырыуын, тәүге шиғырҙар йыйынтығын сығарыуҙа ярҙам итеүен ҙур ихтирам менән иҫкә алды.
Зифа ФӘТХУЛЛИНА,
үҙ хәбәрсебеҙ.
Илеш районы.
