Шулай итеп, быйылдан башлап уйнатылған КХЛ беренселегенең тәүге призеры билдәле булды. Финал уйынының һуңғы хәл иткес көсөргәнешле осрашыуында Ҡаҙандың «Аҡ барс» командаһы Ярославлдең «Локомотив»ын 1:0 иҫәбенә отоп, Гагарин кубогын яуланы. Был инде Татарстан Республикаһы хоккей клубының үҙ тарихында өсөнсө ҙур уңышы. Быға тиклем улар ике тапҡыр (1998, 2006) Рәсәй чемпионы булғайны һәм хәҙер килеп йыһанға ла беренсе булып юл ярҙылар. Афарин! Шулай ҙа «Локомотив» уйынсылары ла был күрһәткескә лайыҡ ине. Нишләйһең, еңеүсе берәү була. Уҙған миҙгелдә лә улар, финалға сығып, «Салауат Юлаев»тан еңелде. Яңы миҙгелдә, моғайын, уларҙың урамына ла байрам килер.
