Баш ҡалабыҙҙа ҡала башҡорттарының ижади, мәҙәни аралашыуға ҡоролған клубы бармы? Әлегә юҡ, әммә ошо көндәрҙә асыласаҡ. Эйе, эйе, тәржемәсе, кинодраматург Зөһрә Бураҡаева, рәссам Арыҫлан Бикбаев һәм М. Кәрим исемендәге республика Милли йәштәр театры актеры Зөлфәр Әхмәтовтар Дүшәмбе тип аталған ҡала башҡорттары ижадханаһы булдырған да инде. Уны асыу тантанаһы 20 апрелдә киске сәғәт 7-лә М. Кәрим исемендәге республика Милли йәштәр театрының Бәләкәй залында уҙасаҡ.
Донъя сәнғәте тарихынан билдәле булыуынса, һәр осорҙоң алдынғы һәм әүҙем кешеләре әҙәбиәт, һынлы сәнғәт, театр, музыканы үҫтереүгә үҙ өлөшөн индерә килгән. Сәнғәт һәм әҙәбиәттәге бөтә ағымдар ҙа улар тарафынан барлыҡҡа килтерелгән дә инде. Дүшәмбе клубында, әҙәбиәт һәм сәнғәттән тыш, сәйәси, милли һәм дини темаларға ла һөйләшеүҙәр ойоштороу ҡаралған.
– Ижадханала күберәк донъя мәҙәниәтенең этник йүнәлештәренә, заман башҡорт әҙәбиәтенә, альтернатив музыкаға, рәссамдар, шағирҙар, яҙыусылар ижадына иғтибар биреләсәк. Театр сәнғәтенең бәләкәй жанрҙары ла урын аласаҡ беҙҙә, – ти ижадхананы ойоштороусы егеттәр Арыҫлан менән Зөлфәр. – Киләһе дүшәмбе көнө асыласаҡ ижадханала йырсылар, шағирҙар сығыш яһаясаҡ, төрлө бәхәстәр уҙғарыласаҡ.
Дүшәмбегә килеп, саф башҡортса файҙалы ял итеп ҡайтығыҙ, дуҫтар!
А. ИСМӘҒИЛЕВ.