Республика йортонда Халыҡ мәшғүллегенә ярҙам итеү буйынса координацион комитеттың ултырышы үтте. Унда республика Хөкүмәтенең вице-премьеры, БР хеҙмәт һәм халыҡты социаль яҡлау министры Фидус Ямалетдинов, республикала быйыл йәй үк мәктәп уҡытыусылары штаты ҡыҫҡартыласаҡ, тип белдерҙе. Барлығы яҡынса 2 меңдән ашыу уҡытыусы һәм 1500 тирәһе эшсе персонал был процедураға эләгәсәк. «Ҡыҫҡартылған» уҡытыусыларға пособие түләнәсәк.
Бындай ҡыҫҡартыуҙың сәбәбе нимәлә һуң?
– Былтыр көҙ мәктәптәрҙе уҡыусыларҙың һанына ҡарап финанслауға һәм яңы эш хаҡы системаһына күсерҙек. Был саралар сиктәрендә мәғариф учреждениеларын һәм уларҙың штат расписаниеларын оптималләштерергә тура килде, – тине республиканың мәғариф министры Зиннәт Аллаяров. – Тик эш бының менән генә бөтмәй әле – вуздарҙа һәм ссуздарҙа сығарылыш имтихандары тамамланғандан һуң республика хеҙмәт баҙарына тағы ла 45 мең кеше сығасаҡ. Күҙаллауҙар буйынса, уларҙың яҡынса 3,5 меңе эшкә урынлаша алмаясаҡ. Йәғни беҙҙе тағы ла 6 мең яңы эшһеҙ көтә. «Ҡыҫҡартылған» уҡытыусыларҙы шул уҡ мәктәптә йәки башҡаларҙа мөмкин тиклем икенсе вакансияларға күсерәсәкбеҙ. Тик бындай урындар бик аҙ. Яҡынса 400 уҡытыусыны ҡайҙа урынлаштырыу билдәле, 96 кешене ҡайтанан һөнәри әҙерләүгә ебәрәсәкбеҙ. Тимәк, меңләгән уҡытыусы эшһеҙ ҡаласаҡ. Оптималләштереү киләһе йылда ла дауам итәсәк.
Эшһеҙ ҡалған уҡытыусыларҙы йәмәғәт эштәренә йәлеп итәсәктәр, пособие түләйәсәктәр, ҡайтанан уҡытасаҡтар.
Яңы диплом алған йәштәрҙе эшкә урынлаштырыу сараларының береһе – предприятиеларҙа стажировка үтеү. Йәш белгесте предприятиеға стажер итеп аласаҡтар, был осорҙа уға минималь эш хаҡын дәүләт түләйәсәк. Ысынында иһә дәүләт кешеләрҙе аныҡ производствола ҡайтанан яңы эшкә өйрәтәсәк. Был предприятиелар өсөн отошло.
– Быға төп эш хаҡы алыу мөмкинлеге тип түгел, ә стаж алыу мөмкинлеге итеп ҡараһаң, эш хаҡы байтаҡ ҡына килеп сыға, – тигән фекерҙә Зиннәт Аллаяров.
«Башинформ».