Һуңғы йылдарҙа республикабыҙҙа ауыл йәштәре проблемаларына иғтибар артыуы – бик ҡыуаныслы күренеш. Ауылда төпләнеп, торлаҡ шарттарын яҡшыртыу буйынса ярҙам алған йәш ғаиләләр һаны ла бермә-бер арта бара. Үҙ йортон төҙөүгә дәүләт ярҙамын файҙаланған ғаиләләр Дәүләкән районында ла бихисап. Шундайҙарҙың береһе – райондың Ҡаҙырғол ауыл советы биләмәһендә Хөсәйен ауылында йәшәүсе Таңилә һәм Фәхрәзи Кәлимуллиндар. Был матур, татыу ғаилә яңы йыл алдынан ғына үҙҙәренең ҙур, иркен, өр-яңы йорттарына күсенде.
– Шундай ҙур ярҙам күрһәткәне өсөн республикабыҙ хөкүмәтенә, район хакимиәтенә бик тә рәхмәтлебеҙ, – ти улар.
Был тырыш ғаилә, ҡайһы бер йәштәр кеүек: «Ауылда эш, аҡса юҡ», – тип зарланып ултыра торғандарҙан түгел. Улар һарай тултырып мал-тыуар тота, ҡош-ҡортон да үҫтерә. Таңилә ауылдағы социаль-мәҙәни үҙәктә китапханасы булып эшләй. Оҫта бейеүсе лә. Мәҙәни үҙәктә үткәрелгән бер сара ла уның ҡатнашлығынан башҡа үтмәй. Ә ғаилә башлығы Фәхрәзи ике эштә эшләй: мәктәп ҡаҙанлығында оператор булып эшләргә лә, «Дәүләкән иген хужалығы» ойошмаһының аттарын ҡарарға ла өлгөрә. Аттарҙы ул бәләкәйҙән ярата. Мәктәптә уҡыған йылдарынан әлеге көнгә тиклем районда үткәрелгән һабан­туйҙарҙа, ат сабыштарында ҡатнашмай ҡалғаны юҡ. 2003 йылдан өс йыл рәттән район чемпионы исемен бер кемгә лә бирмәй, ә башҡа йылдарҙа инде призлы урындар яуламай ҡалмай. Таңилә менән Фәхрәзи алма кеүек өс ҡыҙ үҫтерә. Өлкән ҡыҙҙары Фирүзә – дүртенселә, уртансылары икенсе синыфта уҡып йөрөй. Улар ҙа, ата-әсәһе кеүек, тырыш, тик «дүртле», «бишле» билдәләренә генә өлгәшәләр. Ә бәләкәс Гөлдәргә әле биш кенә йәш.
Хөкүмәт ярҙамын тойоп, үҙҙәре лә ҡул ҡаушырып ултырмаған ошондай йәштәр булғанда, ауылдың да киләсәге өмөтлө.

Диана ШАКИРОВА,
БДУ студенты.