«Йәшлек» гәзитен «Ленинсы» заманынан уҡ бер битен дә ҡалдырмай уҡып барам. Ә уның менән хеҙмәттәшлек итеүемә 50 йылдан ашыу. Үҙебеҙҙең Белорет районы һәм ҡалаһы тормошо, хәл-ваҡиғалары, кешеләре, яңылыҡтары тураһында даими яҙышып торҙом һәм яҙышам. Сәбәбе – үҙең ҡатнашһаң, гәзит ҡыҙығыраҡ була. «Ленинсы» гәзитенең исемен үҙгәртеү тураһында хәбәр ителеп, уның яңы исеменә конкурс иғлан ителгәс, мин «Йәшлек» исемен тәҡдим иттем. Күпмелер ваҡыттан һуң йәштәр баҫмаһы ошо исем менән донъя күрә башлағас, ҡыуанысымдың сиге булманы. Шуға күрә «Йәшлек»те үҙ балам кеүек күрәм. Гәзит килеү менән, күҙлек кейә һалып, тәүге битенән аҙағына тиклем бер тында уҡып сығам. Уйға һалырҙай, фекер йөрөтөрҙәй мәҡәләләрҙе хәтергә һалып, һорауҙары булһа, яуап ҡайтарырға әҙерләнәм. Ғөмүмән, йәштәр баҫмаһы бик ҡыҙыҡлы, фәһемле.
«Йәшлек» иғлан иткән һәр уйында, конкурста ҡатнашып торам. Йылдың тәүге яртыһына иғлан ителгән «Йәшлек»-фараз»да ҡатнашып, еңеүемә тағы ла бер шатландым. Редакция коллективына ижади уңыштар, һаулыҡ, бәхет теләйем.
Нурулла МИҺРАНОВ,
почетлы ветеран.
