Дуҫлыҡ ҡаяларын күрге килә,
Урал тауҙарынан аштырып.
Ер шарында дуҫлыҡ яулау өсөн
Башҡорттарҙың донъя баш ҡоро.

Төрлө ҡитғаларҙан көтөп тора
Рухи сарсауҙарға аш ҡоро.
Сал быуаттар ҡуйған талап бит ул
Башҡорттарҙың донъя баш ҡоро.

Күрешкәндә беҙҙең ҡыуаныстар
Ташҡындарҙан ашып ташҡыры.
Ғаләмдәргә олғашырлыҡ булһын
Башҡорттарҙың донъя баш ҡоро.

Беҙгә ҡаршы өрөр эт табылһа,
Тамағына уның таш торор.
Бары ғәҙеллекте күтәрә бит
Башҡорттарҙың донъя баш ҡоро.

Бар милләтте бергә туплай торған
Ҙур саралар, тимен, яҡшырыр.
Ошо теләк менән йыйыла бит
Башҡорттарҙың донъя баш ҡоро.

Барлыҡ хыялдар ҙа тотош ҡына,
Эй, тормошҡа ғына ашҡыры.
Үтһен бөтә өмөттәрҙе аҡлап
Башҡорттарҙың донъя баш ҡоро!
Ирек КИНЙӘБУЛАТОВ,
Салауат Юлаев исемендәге дәүләт премияһы лауреаты