БР Хөкүмәте Премьер-министры Раил Сарбаев Учалы районының Ураҙ ауылында янғындан зыян күргән ғаиләләргә ярҙам күрһәтеү тураһында ҡарарға ҡул ҡуйҙы.
Ял көндәрендә Ураҙ ауылында янғын сығып, 19 кеше йортһоҙ-ниһеҙ тороп ҡала. Бәхеткә күрә, ҡорбандар юҡ, әммә кешеләр бар мөлкәтен юғалтты. Раил Сарбаев фажиғә урынына барып, халыҡтың ҡайғыһын уртаҡлашты һәм, республика етәкселеге һәр яҡлап ярҙам күрһәтәсәк, тип ышандырҙы:
– Бәлә килгән икән, хәҙер нисек ярҙам итергә, нимә эшләргә кәрәк – бергәләп уйларға тейешбеҙ. Ай ярым эсендә яңы йорттар төҙөргә кәрәк. Урындағы предприятиелар ҙа зыян күреүселәргә ярҙам итәсәк.
БР Төҙөлөш, архитектура һәм транспорт министрлығына төҙөлөш эштәрен ойоштороуҙа һәм яңы йорттарҙы файҙаланыуға тапшырыуҙа ярҙам күрһәтеү бурысы йөкмәтелде.
Бынан тыш, мәктәп йәшендәге балаларға – һауыҡтырыу лагерҙарына, кескәйҙәргә балалар шифаханаларына бушлай путевкалар биреләсәк.
Шулай уҡ, Башҡортостан Хөкүмәте ҡарарына ярашлы, янғындан зыян күреүсе 35 кешегә бишәр мең һум күләмендә матди ярҙам күрһәтеләсәк.
Раил Сәлих улы, янғынға ҡаршы техниканы яңыртыу кәрәклегенә лә баҫым яһаны. Әлеге ваҡытта 1200 кеше йәшәгән ауылда малсылыҡ комплексында ғына бер техника бар.

«Башинформ».