Республика йортонда алдынғы уҡытыусыларҙы, «Йыл уҡытыусыһы – 2010» республика конкурсы еңеүселәрен бүләкләү тантанаһы үтте. «Башҡор­тостан Республикаһының атҡаҙанған уҡытыусыһы» тигән маҡтаулы исемгә 21 уҡытыусы лайыҡ булды. Уларға Башҡортостан Прези­денты премиялары ла тапшырылды.
Президент Мортаза Рәхимов, уҡытыу­сылар­ҙы тәбрикләп, тап ошо уҡытыусылар­ҙың һәм уларҙың меңәрләгән хеҙмәттәшенең тырыш хеҙмәте менән республиканың мәғариф системаһының илебеҙҙә юғары рейтингы һаҡланып килә, тип билдәләне. Мортаза Ғөбәйҙулла улы белем биреү учреждениелары төҙөлөшө буйынса ла Башҡортостандың Рәсәйҙә лидер булыуын һыҙыҡ өҫтөнә алды. Һуңғы 20 йылда ғына меңдән ашыу яңы белем һәм тәрбиә усағы төҙөлгән. Яңыларын төҙөү, иҫкеләрен реконструкциялау һәм төҙөкләндереү иҫәбенә республикала иҫке мәктәптәр һаны ике тапҡырға кәмегән.
Президент уҡытыусылар араһында педагогик оҫталыҡ конкурстары ойошторолоуҙың әһәмиәтен юғары баһаланы.
– Бындай конкурстар изге һәм мәңгелек һөнәрҙең абруйын күтәрә, уҡытыусы хеҙмәтенә дөйөм иғтибарҙы йәлеп итә. Ә иң мөһиме – ул һәләтле, тәжрибәле уҡытыусыларҙы асыҡларға һәм уларҙың эш тәжрибәһен пропагандаларға ярҙам итә, – тине ул.
Президент ҡулынан оло награда алыусы уҡытыусылар үҙҙәренең хеҙмәтенең лайыҡлы баһаланыуы, уҡытыусы кеүек изге һөнәр эйәһе булыуы менән ғорурлыҡ кисерҙе. Улар республика етәкселегенә үҙҙәренең ихлас рәхмәтен һәм изге теләктәрен еткерҙе.
– Дәүләт кимәлендә мәғариф системаһына ҙур иғтибар бүлеүегеҙ өсөн ҙур рәхмәт. Һуңғы йылдарҙа мәктәптәрҙең үҫеше хайран итә. Беҙҙә былтыр ғына яңы мәктәп төҙөлдө. Бындай белем усағында беҙҙең насар эшләргә хаҡыбыҙ юҡ, – тине Дыуан райо­нының Вознесенка мәктәбе уҡытыусыһы, «Йыл уҡытыусыһы – 2010» республика конкурсы еңеүсеһе Ольга Тряскина.

С. НИЯЗОВА әҙерләне.