БР Дәүләт Йыйылышы – Ҡоролтай йортонда БР Үҙәк һайлау комиссияһы тарафынан ойош­торол­ған Башҡортостандың юғары уҡыу йорттары студенттары һәм аспиранттары араһында һайлау хоҡуғы һәм һайлау процесы мәсьә­ләләре буйынса иң яҡшы эшкә 9-сы конкурс еңеүселәрен тәбрикләү тантанаһы үтте.
Бәйгелә БДУ-ның Стәрлетамаҡ филиалы, Сибай институты, Көнсығыш иҡтисад-гуманитар академияһы, БР буйынса Эске эштәр министрлығының Өфө юридик институты, Хеҙмәт һәм социаль мөнәсәбәттәр академияһының Башҡортостан социаль технологиялар институты (филиал), БДУ-ның Нефтекама филиалы студенттары ҡатнашты.
Еңеүселәрҙе тәбрикләп, БР Үҙәк һайлау комиссияһы рәйесе Хәйҙәр Вәлиев тәҡдим ителгән эштәрҙе юғары баһаланы, авторҙарҙың, теманы төплө өйрәнеп, хеҙмәттәрен ҙур ҡыҙыҡһыныу менән башҡарыуын билдәләне.
– Йәш һайлаусыларҙың электрон әүҙемлеге – йәштәрҙең сәйәси тормошҡа ылығыуын сағылдырған социаль-сәйәси индикаторҙарҙың береһе. Конкурстың вуздар араһында популяр булыуы һөйөнөслө. Студенттарҙың әүҙемлеген һәм ижади эҙләнеүен хуплайбыҙ һәм юғары баһалайбыҙ, – тине ул.
Конкурс комиссияһы ҡарары буйынса беренсе урын БДУ-ның Стәрлетамаҡ филиалы студенткаһы Кристина Тепловаға, икенсе урын – Башҡортостан социаль технологиялар институты студенты Оскар Ғиләжетдинов менән ВЭГУ-нан Кари­на Хисмәтуллинаға, өсөнсө урын БДУ-ның Стәрлетамаҡ филиалынан Марина Волкова менән Өфө юридик институтынан Асмик Папян менән БДУ-ның Нефтекама филиалынан Гүзәл Хамматоваға бирелде.
Хәйҙәр Вәлиев еңеүселәргә дипломдар һәм аҡсалата бүләктәр тапшырҙы. Шулай уҡ яҡшы эштәр тәҡдим итеүселәр дәртләндереү премиялары менән дә бүләкләнде. Конкурсанттарҙың эштәре махсус йыйынтыҡҡа индереләсәк.