III Бөтә донъя башҡорттары ҡоролтайы сиктәрендә уҙғарылған «Башҡорт халҡына хат» исемле был концерттан Салауат Юлаев майҙаны шау-гөр килеп торҙо.
Башҡорт эстрадаһының сағыу «йондоҙ»ҙары ҡатнашлығында ойошторолған концерт башҡорт йәштәренең беренсе ҡоролтайына бағышланды һәм унда республикабыҙҙың район һәм ҡалаларынан йыйылған 700-ҙән ашыу делегат, Рәсәйҙең төрлө төбәктәренән һәм хатта сит илдәрҙән килгән ҡунаҡтар ҙа булды. Байрам, исеменән үк күренеүенсә, башҡорт халҡына мөрәжәғәт – хат рәүешендә ойошторолғайны. Белеүебеҙсә, халҡыбыҙҙың бөйөк улдары Салауат Юлаев, Мифтахетдин Аҡмулла, Шәйехзада Бабич, Әхмәтзәки Вәлиди, Рәми Ғарипов, үҙ заманында милләттәштәренә шулай итеп мөрәжәғәт иткән, уларҙың һүҙҙәре һәр башҡорттоң йөрәгенә үтеп инеп, уҡтай ҡаҙалған, көрәшкә әйҙәгән, яҡтылыҡҡа, яҡшылыҡҡа өндәгән һәм күп осраҡта тейешле һөҙөмтәләрен дә биргән. Был концертта ла бик күп артистар – Илсур Тайсин, Роберт Юлдашев, Сәғиҙулла Байегет, «Каруанһарай», «Далан», «Бүреләр», «Арғымаҡ», «Осҡон» төркөмдәре үҙҙәренең йырҙары, моңдары аша үҙ халҡына әйтер һүҙҙәрен еткерҙе. Йәштәрҙең күңеле был һүҙҙәрҙе ҡабул иткәндер, тип ышан­ғы килә.

Руфина ДӘҮЛӘТОВА.